O le sailimalo ma le ola finafinau o le tagata o se tasi lea vaega o le soifua tautua o le tagata i totonu o le atunuu ae o le faaeaea foi lea i lona aiga ma lona atunuu.

O le afioga ia Natasha Tavita Vaaelua ua silia ma le fā tausaga o galuega i totonu o le faalapotopotoga o le PACIFICA Manukau ae lua tausaga o galue o se failautusi.

O se faalapotopotoga a le komuniti o loo faapitoa i le itupa o tina ma tamaitai, ona o le faamoemoe maualuga ia faamalosia tina ma fesosoani i fanau teine i o latou tiute ma galuega i totonu o aiga i le itu o le soifua maloloina aemaise o galuega faatina i totonu o aiga.

E eseese atunuu o le Pasifika o loo auai tina i lea mafutaga, ae o le tāua o le fefaasoaa’i lea o manatu ma lagona o tina ina ia mafai ona latou faasoa foi i le manuia o o latou aiga.

O lenei faalapotopotoga o loo latou ofoina atu se sikolasipi faapitoa i le Kolisi o Tangaroa i le teneitiiti e alualu i luma le taumafai i mataupu eseese ae silisili ona mauaa i lona faasinomaga ma avea o ia ma faata’ita’iga ma vaaiga lelei i tamaitai o le Pasifika.

O le fesoasoani i le tausaga atoa e ala i le seleni e faatau ai togiga aoga ma pili aoga. 

Na saunoa le afioga ia Natasha Tavita Vaaelua e telē le sao o lenei polokalame i lona soifua faaletina, auā e mafai ai ona faamalosia ia o le tina e fai o ia ma leo o tagata Pasifika i totonu o mafutaga, ae lē gata i lea ia mafai ai ona fesoasoani i isi tina o loo fia maua se fesoasoani.

O lona tulai mai i le tofi o le peresetene i lea faalapotopotoga e lē o se mea faigofie, ae iai lona talitonuga e mafai mea uma i le faalagolago i le Alii, faatasi ai ma le auai i mea e fai a le mafutaga e malamalama ai i soo se mea.

E tele vaega o loo tilotilo iai auā le manuia o tina o le komuniti o le Pasifika, e ala lea i le sailia o vaega e maua mai ai seleni mai le malo e faafoefoe ai le tele o polokalame auā le faaauauina o le tautua manuia o tina i totonu o aiga. 

O le filifilia o ia i le tofi peresetene o le faamanuiaga ia te ia, ina ia ta’uleleia aiga ma nuu.

O le tali faafetai atu foi lea i tuaa o si ona tamā o Tavita Fesola’i Tilialo Avei ma Faufili Solinu’u o Fatu’avaina i Faleasiu, na faafaileleina lona olaga a o laitiiti mai i aoga amata seia oo lava ina matua ma fai lona aiga.

O faiva e tapua’ia e a’e ma le manuia.