I le savalia ai nei o le lima tausaga talu ona tofia o se tasi o faamasino o le Faamasinoga o Fanua ma Suafa le afioga Leu Alani Ulia, o le faai’uga o le vaiaso na te’a nei na siitia ai lona tulaga i totonu o galuega fai a lea faamasinoga i le avea ai ma se tasi o Peresitene lagolago.
Na aloa’ia lea tofiga i se sauniga na faatauto ai le afioga Leu Alani Ulia a o molimauina e le afioga i le Peresitene ma le Sui Peresitene o lea faamasinoga tāua a le atunuu, a o molimauina e nisi o lona aiga, faapea le vasega o alii ma tamaitai faamasino o le Faamasinoga o Fanua ma Suafa aemaise o le vasega o Peresitene lagolago o lea faamasinoga.
O Setema o le tausaga e 2019 na faatauto ai lea tamalii e avea ma Faamasino o le Faamasinoga o Fanua ma Suafa a Samoa.
