E toafā talavou ua falepuipui nei ona o le fasiotia o le isi talavou e 16 tausaga o Declan Cutler i Melepone.

Na lipotia atu foi muamua e talafou le mataupu lenei na savali ane ai lē ua maliu i se magaala i le itu i Matu o le aai o Melepone ae osofai ai e se kulupu o tamaiti e to’a 8 i le 2022 i le masina o Mati.

Na osofai e i latou ia si tamaitiiti ua maliu ma toe agai ese i le taavale na o ane ai, ma na maliu ai lava Declan mai ona manu’aga tugā ma sa maua uma lea osofaiga i meapueata a le CCTV.

O le faamasinoga maualuga a Vitoria ia Fepuari na faamaonia ai moliaga o le aualii e toafā i le fasioti tagata ae o le taeao analeila na lau ai le i’uga o le toafā ua molia i le fasioti tagata.

O le isi e 19 tausaga e falepuipui ai ma e tatau ona tuli le 14 tausaga faato’ā agavaa i le palola, o le talavou lea e faaigoa o SA.

O le isi lea e iloa ia QDM e falepuipui mo le 19 tausaga ma le 6 masina, faato’ā agavaa foi i le palola i le mae’a ona tuli o le 14 tausaga ma le 6 masina.

O SY ma DM ua falepuipui foi ma e 18 ma le 17 tausaga o la faasalaga ma faato’ā agavaa i le palola i le mae’a tuli o le ta’i 12 tausaga.

O le isi tamaitiiti e 13 tausaga na aofia foi i le mataupu lea na sao mai le faamasinoga ona e laitiiti tele e lē mafai ona faasala faasolitulafono.

O le isi toatolu na falepuipui uma foi i le vaiaso talu ai.

Puna o Faamatalaga: https://www.9news.com.au/national/declan-cutler-teens-jailed-for-brutal-murder-of-16yearold-declan-cutler-in-melbourne/825fdd18-6d60-4179-94e7-5e8512bb27be