Ua ave se faamaulaloga a le faalapotopotoga o faaputuga tupe o le lumanai manuia o tagata poo le SNPF (Samoa National Provident Fund) i le toaono o ana paaga faipisinisi ua talia talosaga o a latou nonogatupe e aofia ai ma se ekalesia, ona o le faasalalauina i se lipoti a le nusipepa o le Samoa Observer o faamatalaga e faatatau ia latou nonogatupe sa talosagaina ma talia e le Komiti Faatonu o le pulega o le faalapotopotoga.
O le taunuuga o sailiiliga a le komiti o mataupu ma’ale’ale faalotoifale a le SNPF i tuua’iga a le aufaigaluega, e faasaga i le Taitaifono o le Komiti Faatonu, o loo faailoa ai lea faamaulaloga.
O loo faailoa ai foi e faapea o aiaiga faaletulafono o loo taiala ma lima taitaiina ai le pulea o lea faalapotopotoga, o loo matuā tapu ai ona faailoa i se tulaga faalauaitele (confidential) ni faamatalaga o nonogatupe e talosagaina mai lea auaunaga tuma’oti a le Malo.
O le suesuega a le komiti o mataupu ma’ale’ale faalotoifale poo le Grievance Committee o loo faailoa ai e faapea o se molimanao (request) mai le sui Taitaifono o le komiti o tupe a le Palemene, i se imeli na ave i se tagata faigaluega sinia o le faalapotopotoga, na tapena ma ave ai igoa o ia pisinisi ma faamatalaga uma o a latou nonogatupe lea e $67 miliona tala le aofaiga atoa.
O le suesuega foi a le komiti ua iloa ai ua solia i lea gaioiga le vaega 64 (7) o le taiala o faatonuga a le faalapotopotoga, poo le Manual of Instructions o le tausaga 2019.
O loo faailoa e le komiti i lana lipoti ni atugaluga i le tulai mai o lea gaioiga, ona e ono fetaia’i ai le faalapotopotoga ma ni gaioiga faaletulafono, e faatino e paaga tau pisinisi ua aafia tulaga malupuipuia o faamatalaga o a latou nonogatupe.
Ona o lea tulaga ua agai ai nei le komiti e tapa ni fautuaga faaletulafono i se gaioiga talafeagai e tatau ona faatino.
