E lē toe faailo le toatele o alo ma fanau mai le Pasefika e aofia ai ma Samoa, o loo taaalo i le lakapi liki (Rugby Leauge) ma i lipoti mai le ABC Pacific, mo le kalapu o le Gold Coast Titans lava ia, e oo atu lava i le 55 agai le 60 pasene le aofai o tagata Pasefika o loo taaalo mo le kalapu.

Ma o se tulaga maoa’e lea mo lea aulakapi.  

Ma i le amana’ia ai o nei tagata Pasefika, na mafai ona tuufaatasia e le kalapu se po fiafia e faaalia ma faalauiloa ai tu ma aga, aemaise o itu faaleaganuu o tama ma teine taaalo o le kalapu a le Gold Coast Titans i le po anapo.

Ta’ua e se tasi o sui taalo o le kalapu, le alii ia Keano Kini, o se tasi lea o faamoemoe e ese ma le tāua ia te ia ae faapena foi le itu o Gold Coast.  

Na faaopoopo le alii o Keano, o se mitamitaga ia te ia le mafai ona ia faalauiloa lona tupuaga ma lana aganuu.  

O lenei alii e faamauina e Samoa lona tina, ae o lona tamā e ‘afa Maori, ‘afa Peretania.  

I lea po fiafia na mafai ona auai uma ai aiga ma paaga o alii ma tamaitai Pasefika o loo taaalo i le Titans, ma na faatino ai le tele o pesepesega faaleaganuu ma siva, faapena foi ona tofo ai le toatele i kuka ma meaai mai atunuu o le Pasefika na mafai ona saunia.  

Ua ta’ua i lipoti e lata i le 500 tagata na auai i lea faamoemoe tāua.