O le taeao nei na faatautaia ai le faatautoina o Minisita lagolago e to’alua a le Malo le afioga Foisala Lilo Tuu Ioane ma le afioga Toomata Norah Leota.
O le Matagaluega o le Soifua Maloloina lea ua filifilia ai Foisala e avea ma minisita lagolago i le afioga i le minisita ia Valasi Luapitofanua To’ogamaga Tafito Selesele ae mo Toomata ua filifilia nei e avea ma minisita lagolago i le afioga i le Sui Palemia Tuala Tevaga Iosefo Ponifasio i le Matagaluega o Tupe Maua ma Tiute.
E pei ona silafia o sui fou ia o le Palemene e le’i leva nei ona faatauto i totonu o le maota fono e pei ona tulai mai ai Foisala e avea ma faipule o Gagaifomauga Nu. 2 ina ua tuumalo le afioga Vaele Paiaaua Iona Sekuini, ma le susuga Toomata Norah Leota o se tasi o sui faipule tamaitai e atoa iai le 10% o nofoa o tina i le Palemene, mai le itumalo o Anoamaa Nu. 2.
Na ave le faamalo ma le faamalosiau a lana afioga i le Palemia Fiame Naomi Mata’afa i minisita lagolago ua faatautoina ina ia faatino galuega ma le faamaoni mo se manuia o le atunuu atoa faapea Matagaluega ua filifilia e galulue ai.
