O itumalo o Aana Alofi Numera 3 ma Sagaga Tasi (1) i le motu o Upolu ua faaopoopo atu i itumalo faapalota ua faamatuu iai vaegatupe muamua ta’i 160 afe tālā, o le miliona tālā lona lua.
Peitai o Aana Alofi Numera 3 ua faamatuu foi iai ma le 420 afe tālā o le vaegatupe e 840 afe e atoa ai le tasi le miliona, ona ua mae’a tuuina atu e le taitaifono ma le komiti o le Fono Faavae a lea itumalo ana lipoti o le sueina o tusi o le faaaogāina o lana miliona muamua, faapea lana fuafuaga o atina’e mo le faaaogāina o lana miliona tālā lona lua.
O faafitauli o loo aafia ai nisi itumalo faapalota i le faasafuaina atu o ia vaegatupe mo le atina’e o le manuia o tagata o itumalo e 51 na fesiligia ai le Minisita o loo iai le vaaia o le poloketi, poo le ā se silasila a le komiti faafoe le steering committee i le lumanai o le poloketi ma le faia o ni suiga i le lē toe avea o sui faipule ma taitaifono o komiti o Fono Faavae o loo lufilufiina ma faasoa atu le ta’i miliona e ala i atina’e o loo faatino.
Le tamaitai Minisita o le Matagaluega o Tina ma Tamaitai Atina’e o Afioaga ma Aga Fesootai o loo vaaia le poloketi miliona tālā, le afioga Mulipola Anarosa Ale Molioo.
O le miliona lona tolu e pei ona fuafua i le isi tala faatatau autu o le tupe mo le tausaga faaletupe fou ua faailoa e le minisita e lē toe tuai ona faamatuu i tua ona ua lava le silafia o komiti o Fono Faavae i aiaiga ma auala e faatino.
