E tolu ausoka i lalo ifo o le sefuluono tausaga le matutua a tamaitai na latou sailia se ‘au e ono ofi atu i le taamilosaga soka o le OFC U-16 Women`s Championship lea e faia i Fiti i le aso 8 e oo atu i le aso 21 o Setema i le tausaga nei.
O ‘au e tolu e aofia ai le ‘au mai Papua Niu Kini ma le ‘au mai tatou uso i Amerika Samoa, ma o nei taaloga uma sa faia lea i totonu o Aukilani i le vaiaso ua mavae.
O le taaloga muamua a Samoa na taaalo ai ma le ‘au mai Papua Niu Kini ma sa manumalo ai i le 11 ‘ai i le leai a Papua, o lana taaloga lona lua na toe manumalo ai i le ‘au mai Amerika Samoa i ‘ai e 11 i le leai a Amerika Samoa.
Ua tapena nei le ausoka a Samoa i lalo o le sefuluono tausaga le matutua a tamaitai e agai atu i Suva i Fiti e feiloai ma isi ‘au malolosi e aofia ai le ‘au mai Fiti, Tonga, Cook Islands, New Zealand, New Caledonia, Tahiti ma Solomona.
O Samoa o lea ua mautinoa lona iai i le Pool A ma Fiti, Tonga ma Cook Island ae o le Pool B e iai Niu Sila, New Caledonia, Tahiti ma Solomona.
O le faamoemoe o lenei taamilosaga o le ‘au e siamupini mai ai e mafai ona fai ma sui o le Oceania i le Ipu o le Lalolagi o le FIFA U-17 Women’s World Cup i le tausaga fou 2025.
O le ‘au a Samoa o loo filifilia mai i fanau mai Ausetalia, Niu Sila, Samoa ma Amerika.
