Ua faamautū nei sootaga e galulue faatasi ai le Iunivesite Aoao a Samoa ma le Iunivesite i Tonga o le Christ University Pacific ina ua mae’a sainia ai se maliega i le va o iunivesite e lua, i le faamoemoe e fetufaa’i tomai tau a’oa’oga.
O se maliega foi o le a saga fausia ai le mafutaga vavalalata a tagata o Samoa ma tagata o le atunuu o Tonga o se tasi o malo tuaoi ae o se paaga totino a le malo o Samoa.
O le pule o le iunivesite aoao a Samoa o ia foi o le Pelesetene o le Iunivesite aoao a le atunuu le afioga Tuifuisa’a Patila Malua Amosa na la sainia lea maliega ma le Pule ma le Faatonu o le Iunivesite o le Christ University Pacific i Tonga le susuga i le faifeau o Reverend Dr Vili Vailea Saulala.
O le fuafuaina o polokalame tau a’oa’oga i soo se tomai o le a galulue faatasi ai Iunivesite e lua, e pei ona faailoa i se pepa o faamatalaga i le mae’a ona faamautū o lea maliega.
