Ua faamautu mai e le Faletupe Tutotonu o le tatou atunuu le Central Bank of Samoa, le malupuipuia ma le sologa lelei o auaunaga a faletupe faapisinisi poo commercial banks i totonu o Samoa.

Ua faailoa lea tulaga lelei o ia faletupe i lo tatou atunuu ina ua aliali mai ni faaletonu i faletupe tetele faapisinisi i totonu o Amerika e pei o faletupe o le Silicon Valley, Signature, ma le Silvergate bank.

O aafiaga tau tupe o ia faletupe i le Iunaite Setete e le o aafia ai faletupe faapisinisi i Samoa e pei ona faailoa e le Faletupe tutotonu o Samoa i se pepa o faasalalauga faalauaitele.

O ia faletupe i le Iunaite Setete ua faaalia i lea pepa o faamatalaga e leai ni sootaga i faletupe i lo tatou atunuu o loo autovaa iai o tatou tagata mo faiga tau pisinisi.

Ua faamautu mai foi e le faletupe tutotonu o Samoa, o loo saogalemu ma lelei foi teugatupe i fafo mo fefaataua’iga e le o iai ni aafiaga i ia faaletonu o loo tulai mai i Amerika, ma e pau vaega o le lalolagi e ono iai aafiaga o atunuu Europa.

O loo faaauau ona mataitu e le Faletupe Tutotonu ia faaletonu tau tupe o loo tulai mai i le Iunaite setete.