A’o feagai ai le atunuu ma le faafitauli o le pepesi o le siama o le faama’i ma aafia ai le toatele o tagata , o loo vaaia pea le soifua maloloina o nisi o tagata matutua o le atunuu e pei o le tinā matua ia Tele Semu lea na faailoga e lona aiga le 102 tausaga o lona soifua i le vaiaso nei.
I ripoti a le Samoa Global News e faapea o le Aso 20 o Aperila 2022 na faamanatu ai lenei matāti’a taua a le tinā ia Tele Semu i lona aiga i Tufulele. Na soifua a’e Tele i le Aso 20 o Aperila 1920 i Falevai Falelatai.
E tele augatupulaga na tupuga mai i le tinā matua ma e silia ma le to’a 200 i latou, e to’a 9 lana fanau, silia i le to’a 74 fanau o lana fanau, to’a 105 fanau o fanau o lana fanau ma le to’a 15 o fanau o fanau o fanau a lana fanau.
O se faamanuiaga i le aiga o Tele le soifua mai pea o lea tinā ma ua ia tausi foi i lana fanau mai i latou na ola a’e i ona lima ma i faamaumauga mai le UN i le pasene o tagata e aulia le silia i le 100 tausaga i le lalolagi le siitia ai i le tausaga na te’a nei i le to’a 573,000 ae mo Iapani mai le 86,000 na ausia le 100 tausaga e 88% o i latou nei o le itupa o tinā.
