Ua faaalia le manaoga o le tamā ia Lauano Ah Ching ina ia fai se pa e si’o ai le maketi i Fuaglei ona ua lē saogalemu i taifau taaloa.
Na faailoa e le tamā ia Lauano ua 64 tausaga le matua o le soifua, mai afioaga o Sinamoga ma Leauvaa e faapea ua le saogalemu le tulaga o a latou poloka ona o taifau taaloa.
Na ia ta’ua afai e agai i o latou aiga ae ufi a latou mea faatau i le maketi e foi mai ua leaga totonu o poloka i taifau ua faainaelo solo ai (tulou).
O le ala lea o le talosaga mo se pa e si’o ai le maketi.
Sa ia ta’ua o la latou auaunaga e tāua aemaise le taimi e autovaa atu ai tagata e faatau o se tulaga lē matagofie le manogi ma le lē saogalemu ona o taifaui taaloa i le maketi.
Na ia ta’ua foi o se nofoaga mo le fofoga taumafa o le atunuu peitai afai o le tulaga lea, ua lē saogalemu foi la mo le soifua maloloina.
Sa ta’ua foi o loo iai le sikulati e leoleo i le po peitai e lē mafai e le leoleopo ona vaaia uma itu e fā o le maketi.
Ua faailoa e Lauano e matagofie le autovaa mai o le atunuu ae o loo saogalemu ma matagofie mea uma.
