O le faatupega o le faagaioia o togafitiga o gasegase i le falemai faamama toto i Motootua ma le falemai i Tuasivi, e le taugofie, ae o le fesoasoani e ala i foai tupe mai le mafutaga a faletua o faifeau ma tina o le ekalesia EFKS le Tautua Puapuaga o Tagata, ma le mafutaga a faletua o faifeau ma tina o le ekalesia Metotisi le Au Uso Fealofani, ua lagolagosua lea i le pitolaau faifai pea a le Malo aua le ofoina o togafitiga mo i latou ua aafia o latou fatuga’o.

O le Mafutaga o le Au Uso Fealofani ua latou tauaao se foai tupe  e sefulu afe i le Minisita o le soifua maloloina ma le pulega o le falemai faamama toto, e lagolagosua ai i le pitolaau faifai pea a le Malo o loo tafe atu ai seleni i tausaga uma, aua le faagaioia o lea auaunaga tāua mo i latou ua faamama le toto ona o aafiaga o fatuga’o.

Ua faaopoopo lea seleni i le foai tupe e fitusefulu afe tala a le Mafutaga a Tina o le Ekalesia EFKS ua mae’a foi ona tuuina atu mo falemai faamama toto i Motootua ma Tuasivi.