I le 20 tausaga o avea ai ma faamasino o le faamasinoga a Samoa, ma le avea ai o le afioga i le faamasino sinia o le faamasinoga sili a le atunuu ma uluai tagata Pasefika ua filifilia o se sui o le komiti faavaomalo mo aiātatau a fanau, o lea ua faailoa lautele mai le iai o se faaaloalo maualuga ua amanaia ai e le Iunivesite o Canterbury i Niu Sila, lea tamalii o le atunuu.

Ua faailoa e le Iunivesite o le Aso Tofi asau o le a faaee atu ai le faailoga fomai o le Tulafono, poo le Honorary Doctorate-Doctors of Law i le afioga Vui Clarence Nelson.

Ua faailoa e le afioga i le faamasino sinia i se pepa o faasalalauga e faate’ia o ia i le logo atu e le iunivesite o le faaaloalo maualuga, sa leai sona manatu e tau ane o ia i se finagalo o le iunivesite i se faailoga tāua ma maualuga mo ia.

Ua faaalia ai foi e Vui, e le gata o se matati’a lea i le talafaasolopito o lona soifuaga faafaamasino, ae o se tala ave ma se faaeaea tāua mo le faamasinoga a Samoa.

O le tausaga e 1977 na faauu ai o ia mai lea iunivesite i ona faailoga faaloia ma o se tasi o alo ma fanau a le atunuu na mau avanoa i le aoaoina i Niu Sila mai lona talavou a o feagai ai ma aoaoga.

O le afioga Vui Clarence Nelson o le uluai faamasino ua seei i le tulaga faamasino sinia o le faamasinoga a Samoa i le tausaga e 2021, ma ua 67 tausaga o lona soifua.

O ia o se tasi o poutu o galuega a le faamasinoga i mataupu tau solitulafono ma mataupu i le faamasinoga lautele poo le civil court.