O atugaluga ma popolega i le sao atu pea i le atunuu o fualaau faasaina aemaise o auupega e pei o laau malosi  e lē faatagaina i le atunuu ua faaleo ai ma nisi o popolega a sui o le Palemene.  

O le puipuia malu o le atunuu mai le sao atu ai o ia ituaiga oloa e matuā tapu i le atunuu ua lāgā ai foi ma ni popolega i le tuai faatino o le fuafuaga mai le taimi o le faigamalo sa iai o le aumaia lea o le masini faaata poo le xray scanner e sue uma ai e le auaunaga a le ofisa o tiute pusa oloa o loo faaulu atu Samoa. 

O ia atugaluga ua faaalia ai e le taitai o le malo, le tamaitai Palemia i sona finagalo e tali ai ia fesili ma ia taua ai o loo faamautu pea le fuafuaga e auvatu le masini faata. Ae i le finagalo o le Minisita o Tiute ma Tupe Maua e fitoitonu iai lenei fuafuaga le afioga Tuala Tevaga Iosefo Ponifasio na ia saga faamautu ai le faaaogaina o lea masini i le taimi e auvatu ai ma faatulaga i se nofoaga i le uafu tele i Apia o le a suesueina uma ai pusa oloa. 

O se tasi o vaega taua mo lea galuega ua fautuaina ai foi nisi o finagalo o faipule o le malo le tatau ona lua ni taifau sosogi e faaaoga e le Ofisa o Tiute mo le sueina faatapito o soo se uta ma ni faamomoli e aumai mai fafo ina ia taofia le toe sau atu o laau malolosi e lē faatagaina ma fualaau faasaina i totonu o le atunuu