O Dubai lea sa amata ai le vae muamua o le taitoafitu a le World Rugby Seven e pei ona faataunuuina i le faaiuga o le vaiaso. 

O Samoa sa iai i le Pool A faatasi ai ma Aferika, Niu Sila ma Kanata. 

O le taaloga muamua a Samoa na taaalo ai ma Aferika, ma malolo ai le Manu Samoa i le 14 ‘ai i le 22 a Aferika, toe taaalo ma Niu Sila ma toe faia’ina ai ia Niu Sila i le 14 i le 12 a le Manu Samoa. 

Ma o le taaloga lea o se taaloga mataina tele i le Manu Samoa, ona toeitiiti lava mae’a le taimi o sili ‘ai o Samoa, peitai o toe sekone o le taaloga o loo totoe ae toe sikoa ai le alii o Brady Rush o Niu Sila ma manumalo ai loa Niu Sila. 

O le taaloga mulimuli i le Pool na manumalo ai ia Kanata i le 22 ‘ai a le Manu Samoa i le leai. 

E tasi le manumalo ae sa maua lava le avanoa o le Manu Samoa e ofi atu ai i luga i le sailiga o le ipu autu ona o le taamilosaga lea i Dubai na o le 3 Pool sa vaevaeina iai ‘au o le taamilosaga. 

O le sao atu o le Manu Samoa i le quarter final na taaalo ai ma le ‘au a Argentina ma faia’ina ai i le 21 i le 14 a Samoa. 

O lana taaloga mulimuli na taaalo ai ma Aialani i le sailiga o le tulaga 5 ma le 6 ma manumalo ai Aialani i ‘ai e 28 i le 7 a le Manu. 

O le taimi nei ua see mai le Manu Samoa 7 i le tulaga 6 i le faasologa o ‘au taitoafitu a le lalolagi, ae o loo tulaga (1) Aferika (2) Argentina, (3) Niu Sila, (4) Fiti (5) Aialani ae tugala ono ai Samoa. 

O lea ua tapena le isi vae o le taitoafitu i Cape Town i Aferika i Saute ma o Samoa o loo lavea i le Pool C e aofia ai Niu Sila, Ausetalia ma Kanata. 

O le aso 9 ma le aso 10 lea o le a faataunuuina ai le isi vae lea o le taitoafitu a le World Rugby Seven.