O le saunoaga a le tamaitai ia Precious Miriama Tusega ua avea nei ma Miss Samoa NZ 2024 i le 2025, e lē o tausala uma e avea ma Miss Samoa NZ. 

O le uiga o lana saunoaga na ia faafetai ai i le Atua ona o lenei avanoa tāua ua avea ai o ia e tauaveina le pale o le Miss Samoa NZ. 

I le taimi na valaau ai lona igoa o ia ua manumalo, e lei faapea na faate’ia o ia, ae sa iai lava le filemu o le Atua i lona loto ma faafetai ai i le Atua i lona valaauina. 

Sa vaaia le tagi o lona tina ma faamalo atu ia te ia a o iai i le finauina o se Tausala o Samoa i Niu Sila. 

Na ia momoli foi lana faamalo i tamaitai uma sa latou tauva auā e tāua le taimi sa latou galulue faatasi ai ma ona uso tausala sa maua ai le taimi e fesoasoani le tasi i le isi, faamalosi le tasi i le isi a o loma ai le faamoemoe. 

I le seei mai o le Miss Samoa NZ ia Precious Miriama Tusega i le tofi, ua ia ta’ua ai e tele ni vaega o loo fia galue ai mo le komuniti a Samoa i lenei taimi pupuu o lana nofoaiga, aemaise lava i tupulaga talavou i tulaga i a’oa’oga a o lei see atu i Samoa i le tauvaga lea e faia ia Setema i le sailiga o se Miss Samoa. 

O lana tapenaga foi mo Samoa i le tauvaga ia Setema e lua lava vaega o loo vaavaai toto’a iai, o le taleni ma le taliga fesili faatasi ai ma teuga e fai i le faamoemoe atoa i Samoa. 

O loo iai lona faatuatua i le Atua ma lona lototoa e mafai ai ona ia aea le mauga lea o loo faamoemoe iai ia Setema.