Ua savalia nei le 16 tausaga talu ona faatūina e le Malo le ofisa o le Pulega Faatonu poo le Regulator ma faaaogā ai lana ulua’i tagāvai poo se LOGO, peita’i ua faaalia e le tamaitai Pule Faatonu e le’i atoatoa i lea tagāvai auaunaga uma o loo faatino e lea ofisa o le malo.
O le Aso Tofi o lenei vaiaso na faalauiloa ai le tagāvai poo le LOGO fou a lea auaunaga tāua a le Malo e pei ona sa faia se tauvaga e sa’ili ai se ata tusi e avea ma tagāvai e fai ma faailoilo e faamatala ai auaunaga uma a le ofisa o le Pulega Faatonu a Samoa.
Na manumālō ai le ata na tusia e le susuga Sani Tago o le afio’aga o Malie ae o loo galue nei i le Ofisa o le Fono Aoao Faitulafono, sa ia maua le faailogatupe e $1,500 tālā.
O le sauniga faalauiloa o le tagavai a lea ofisa o le malo o le ulua’i tiute lea o le sui Faipule o Vaa o Fonoti le tofa Mau’u Siaosi Pu’epu’emai talu ona filifilia i le masina o Ianuari o le tausaga nei e avea ma Minisita o le Matāgaluega o Fesoota’iga ma Faamatalaga Faatekonolosi e aofia ai ma le ofisa o le Pule Faatonu.
Le afioga i le Minisita o le Matāgaluega o Fesoota’iga ma Faamatalaga Faatekonolosi e aofia ai le ofisa o le Pule Faatonu, le tofa Mau’u Siaosi Pu’epu’emai.
