I le silia ma le lua tausaga o faatali tagata malaga sa totogi tupe o pasese i le Samoa Airways i faigamalaga na lē taunuu ona o le faafoi o le vaalele o le Malindo Air ma taofia malaga ina ua tapunia tuaoi faavaomalo e mafua i le pipisi o le faama’i Koviti-19, o lea faato’ā faatino e le kamupani vaalele o le Samoa Airways le toe totogiina o tupe o pasese a tagata malaga sa lē faataunuuina a latou malaga mai lea taimi atoa, ina ua faailoa e le Minisita o loo iai le vaaia o le kamupani vaalele se vaegatupe e 6 miliona o le a toe faaola ai tupe o pasese na totogi ae e lei taunuu faigamalaga.
O se tasi lea o to’a sa agiga ai ni finagalo lē fiafia o tagata malaga na aafia i le tuai maua o se tali mai le kamupani vaalele poo afea e toe faafoi atu ai a latou tupe o pasese na totogi. Ua faailoa e le Minisita le tofa Leatinuu Wayne Sooialo i le tauaofiaga a le Palemene ua mae’a atu nei, o le ono miliona ua faatatauina i le tala autu lona lua o le tupe ua pasia, e le gata o le a toe totogi ai tupe o pasese, ae o le a totogi ai foi nisi o aitalafu e pei o le faatauina e le Malo o le malaevaalele i Fagalii, ma totogi ai foi seleni o saofaga a tagata faigaluega a le Samoa Airways i le NPF e lei totogia.
O le ono miliona foi o le a vavae ese ai se vaegatupe e totogi ai faamanuiaga a tagata faigaluega o le Samoa Airways ua faamuta a latou auaunaga ona o mafuaaga e fesootai ma le toe fetuunaiga o galuega faatino a le kamupani vaalele.
