O le Aso Toonai 27 Ianuari sa fai ai le lotu faamanatu a tamafanau a Simanu ma Tilau i Niu Sila e pei ona masani ai.
Na felanulanuai tapenaga, ma matagofie mea uma i le sagisagi mai o le paia ma le mamalu o le aiga sa Simanu mai pitonuu eseese o Niu Sila nei.
O Simanu o le faifeau toeaina faatonu o le Ekalesia Faapotopoga Kerisiano i Samoa.
O ona mātua o Fagumoega Faamanini Tagaloa ma Taufaoa Faautagia, ae na fai ma tama a Tuiloma Olive o Faleulu Sapunaoa, ma Feagai le afafine o Tagaloa Loau o Saoluafata.
O mātua o Tilau o Talataina Filipo o Saoluafata, ma Fagamealata Muliagatele o Faga Savaii ma Sapunaoa Falealili.
E toasefulu le fanau a Simanu ma Tilau ma le la fanau tausi e toalua.
O Tuiloma Filo, Rev Nuualiu Fuatai Simanu, Rev Reti Simanu, Peaario Ieremia, Leiu’a, Aniva Sipi Masoli, Ufiata Omo Sagapolutele, Saiauala Uluiva, Olita Asiata Ugapo, Tafaoimalo Anetone, ae o fanau tausi o Seu Faalevao Fuimaono, ma Toilolo Auina.
Ina ua maliu Tilau na toe faaipoipo atu le toeaina o Simanu ia Lole Mataafa, na tausi ai lea o le la tama teine le susuga i le faafeagaiga ia Miriama Simanu o loo faifeau nei i le Salvation Army (Matron) i Flatbush Auckland.
Ua maliliu le toatele se’i vagana ai le susuga i le tamaitai faifeau ia Miriama Simanu, sa auai i lea aso.
O ia foi lea e taitaifono i le komiti a le aiga, sa faafoeina lenei mafutaga.
E 14 le aofaiga atoa o faletama, ae 11 na auai.
Ua leva le mafutaga a le aiga sa Simanu i Samoa, ae o Niu Sila, o le mafutaga muamua lava sa faia i Porirua Ueligitone, i le 1982.
O le tausaga mulimuli sa fai ai le lotu faamanatu a le aiga i Niu Sila o Fepuari 2020 i Weymouth, na sosoo ai lea ma le mafutaga i luga o le Zoom i le 2021 i taimi o le koviti, o lea la faatoa toe faia lea o se mafutaga i le tino e pei ona masani ai.
O tino matutua sa auai i le Aso Toonai o faifeau penisiona malolo o Rev Maligi Evile alo o Rev Fuata’i ma Rev Tala Reti Simanu, Faafanua Sagapolutele, ma le susuga i le faafeagaiga ia Miriama.
Sa lē auai mai le susuga ia Rev Lale Ieremia (Peaario Ieremia) ona sa malaga i Samoa, ae sa auai ona alo.
O le autu tāua o lenei mafutaga ia tumau le fealofani o le aiga, ma ia fefaamasania’i fanau ia malamalama i o latou tupuaga ma sootaga.
O le polokalame o le aso sa faatautaia e Tuiloma Iosefa mai i le laina o Tuiloma Filo.
Na ta’ita’i le sauniga e Rev Tafatolu Apelu EFKS Onehunga, o lona faletua o Merina Ieremia alo o Lale Ieremia, mai i le laina o Peaario Ieremia.
Na molia talosaga e susuga i faifeau malolo ia Rev Maligi Evile, Rev Tala Simanu ma le susuga i le tamaitai faifeau ia Miriama Simanu (Matron Salvation Army).
Na mae’a le sauniga ona sosoo lea ma le faailoaina o faletama eseese, sosoo ai ma le taumafataga o le aoauli.
Na mae’a le taumafataga ona fai lea o le fonotaga a le aiga e faatalanoa ai mataupu eseese.
I le fono a le aumatutua sa faama’oti ai le faia o lotu faamanatu i tausaga taitasi i Aukilani.
Sa faailoa ai foi saofa’i o loo fai a le aiga i Samoa i mea ane o ai se isi e fia nofo. I le fonotaga a le autalavou na faatalanoa ai le taua o le mafutaga ia faamasani le autalavou, ia paleni le faaaogāina o le Gagana Samoa ma le Gagana Peretania mo le latou malamalama, ma ia iai se sui o le autalavou i totonu o le komiti o meafai a le aiga.
Na faaiuina le mafutaga i aitema ma siva Samoa a faletama taitasi, ona fai ai lea o le tatalo faaiu e le susuga ia Rev Tala Simanu, usu ai ma le pese ‘Bind Us Together’.
