A o tulimata’i e le malo o Saina le samiina o le atoaga o le 50 tausaga o lana faigapaaga faavaomalo ma Samoa, o se tasi o fesoasoani tāua a lea malo tele o ona tagata ua a’oa’oina i tomai faafoma’i ua galulue i Samoa i se feagaiga ua mae’a faamautū i le va o malo e lua.
I le tau faai’ui’u ai o le taimi galulue i lo tatou atunuu o nisi o foma’i mai lea atunuu, sa malaga i latou i le motu o Savaii ma faia ai se galuega fesoasoani i le vaaia o gasegase ma le lautele o le atunuu i lea motu e pei ona sa faamautū ai lea galuega i le falema’i i Sataua i le itumalo o Vaisigano 2.
O le sui faipule foi o le itumalo ma le Minisita o le Soifua Mālōlōina sa ia faafetaia lea galuega a foma’i mai Saina, ua vaai fua ai o tatou tagata i lea itu o Salafai.
Le afioga Valasi Luapitofanua Toogamaga Tafito Selesele o le Minisita o le Soifua Mālōlōina.
O le masii i Savaii o foma’i mai Saina sa malaga ai foi ma le amepasa o lea malo i Samoa e molimauina lea galuega ma avanoa ai ona silasila i nisi o auaunaga tau soifua mālōlōina o loo mana’omia ai se fesoasoani.
