E faitau selau tagata faigaluega o le malo, ma sui o le Iuni mo tagata faigaluega na omai faatasi i Ueligitone i le amataga o lenei vaiaso.
Ua savalia aai o Ueligitone e faaali lo latou tetee atu i fuafuaga a le malo ua faalauiloa nei i le tipi ai poo le aveesea o nisi o galuega ma auaunaga a le malo (public sector) ae taga’i i le faatupula’ia o le faaaogāina e le malo o auala faaneionapo o le AI poo le Artificial Intelligence i auaunaga uma a le malo.
Na tuufaatasia e le Asosi o Tagata Faigaluega lenei solo tetee ma na molimauina ai le to’atele na faaalia ma le loto momomo o latou lagona faanoanoa aemaise o le tigāina i galuega, ma le to’atele o tagata ua leai ni galuega ma le aafiaga ua iai nei i le lautele i totonu o le atunuu.
Faaalia e se tasi o tagata faigaluega a le malo, Briar Wyatt, ua matua’i lē lavavā nai ‘aufaigaluega i suiga a le malo, aemaise le tulaga mafatia sa iai le to’atele ona o suiga i faatulagaga o galuega poo le restructure o ofisa, e pei ona molimauina ai nisi ua āu i le ta’i 12 itula o faigaluega ae ua vaaia le tuuitiitia o le numera o ē galulue.
Na faapea mai atili lea tama’ita’i, afai ae faamauina suiga ua fuafuaina a le malo, o se sasa lea i nai tagata faigaluega, i auaunaga lautele a le malo.
Ua upuia foi e le failautusi aoao o le PSA, Fleur Fitzsimons le faigāmalo i lona faia ma le mautinoa o le gaioiga o le talepe o auaunaga lautele ma lo latou taumafai e aveese tagata faigaluega ae tuu atu iai masini ma auala faatekonolosi poo le AI.
Ae na faalia e le pulenuu o le aai, Andrew Little, na fai lava sina ogaoga o aafiaga na iai suiga talu ai, ma o lea ua vaaia ai lava tulaga faaletonu o le tamaoaiga a lo latou aai, ua aafia ai fale’aiga, o pisinisi ma le to’atele o tagata o loo faalagolago i tagata faigaluega i le public sector.
Ua upuia foi e le sui faipule o le vaega faaupufai a le Green Party, Tamatha Paul faamatalaga a le tama’ita’i Minisita o Tupe, i le faaitiitia ai o le numera o tagata faigaluega i le malo i totonu o Ueligitone, ae faailoa e le sooupu a le Leipa, e leai so latou manatu e faatino ia ituaiga fuafuaga.
O loo tālia pea se tali mai le ofisa o le Minisita o Tupe mo se faamatalaga.
Puna o Faamatalaga: https://www.rnz.co.nz/news/political/596187/hundreds-gather-in-wellington-for-psa-protest-against-proposed-public-service-cuts
