Ua ioe se alii Waikato i lona susunuina o le fale a le Kāinga Ora a lona tamā i le uma ai o se la inuga ma oo ai lava i se feeseesea’iga ona o fuālaau faasāina.
Na tula’i i luma o le Faamasinoga Faaitumalo i Hamilton, le alii o Renata Leaf ma ia ioeina ai lona susunuina ma le loto iai o le fale.
Faamauina o lenei matāupu na tupu i le masina o Tesema o le tausaga talu ai 2025.
Faamauina i faamaumauga a le faamasinoga na māfua le ita tele o Renata ona ua fiu e fai atu i lona tamā e momoli ia i le itu e faatau ai fuālaau faasāina ae musu lona tamā.
O lea na ia tatala ai loa ona ofu ae fealua’i telenoa se’i tulou, ma ia faalālā se naifi i lona tamā, ma o lea na sola ese ai loa le tamā mai le fale ona o lona fefe tele i lona atalii ma ana gaioiga.
I ripoti mai le leitio faavaomalo a Niu Sila, le RNZ, na faamauina ai o lea na amata tata’e ai e Renata Leaf faamalama ma faitoto’a o le fale ma ua faalogoina foi le leoleoā i totonu o le fale, ua amata valavalaau ni faamatalaga taufaamata’u ma ia susunuina ai loa le fale.
E faapea na ia faaaogāina se afitusi, na tutu ma susunu ai le nofoa momi poo le couch.
Faaalia ina ua iloa e le alii ua sasao ane le afi, o lea na ia tamo’e ane loa e ave uma i fafo ana ta’ifau e 3 sa i totonu o le fale, ma matamata loa i le mu o le fale.
O le fale na faatama’ia e le afi o se fale a le Kāinga Ora, ma e faapea e oo atu lava i le 160 afe le tau o le fale ua faaleagaina nei.
Na mulimuli ane ta’u e Renata Leaf i leoleo, o ia lea na susunuina le fale, ma o sona auala lea na ia faia ina ia ‘au atu ai manatu o lona tamā ma lona uso ia te ia.
Ae o le mea mata’utia na te lē manatua lelei nisi o vaega na tula’i mai i lea aso ona o le ‘onā tele o lea alii.
O loo faanofo vaavaaia nei o ia (electronically monitored) i le Grace Foundation e faatali ai le lauina o lona faasalaga i le masina o Aokuso.
