Ua mae’a ona su’esu’e e le Faamasinoga o Talosaga toe iloilo a le Faamasinoga o Fanua ma Suafa le talosaga a le afio’aga o Leauvaa ua lu’i ai le poloa’iga a le Faamasinoga Maualuga o Fanua ma Suafa i le faatula’i ese o aiga e 18 o le nuu o loo nofoia se vaega o fanua e faasino i le afio’aga o Afega.
O eleele ia o loo i tua mai o le 723 eka o lea afio’aga ua mae’a tuuina atu e faaaogā ma nofoia e Leauvaa.
O le poloa’iga lea na māfua ai ona tula’i mai ni feteena’iga i le va o ia afio’aga e lua ma taofia ai i se poloa’iga lē tumau a le Faamasinoga Maualuga le faaauauina o le galuega a le nuu o Afega na faataoto ai tuaoi o ia eleele.
O su’esu’ega a le Faamasinoga o Talosaga Apili a le Faamasinoga o Fanua ma Suafa i le vaiaso ua mavae sa tula’i ai loia e finauina mau a ia afio’aga e lua ma ua faatali nei se faai’uga e fofogaina i le aso 26 o le masina nei o Iuni.
