O le aoauli o le Aso Sa ua mavae atu nei na taunuu ai se vaalele tele o le fitafita o le malo o Niu Sila, ma se aumalaga o tagata popoto e faia su’esu’ega o le faalavelave na pa’ulia ai i le po o le Aso Toonai le vaa su’esu’e o le fitafita a Niu Sila le HMNZS Manawanui i ogasami i Saute o le motu o Upolu e lata i le gataifale o Siumu ma Safata.
E lē gata na pa’ulia le vaa i le po ae na goto uga ifo i le alititai i le taeao o le Aso Sa, e pei ona sa molimauina e nisi na latou vaaia foi le sasao a’e o le afi ina ua mu lea vaa o le fitafita o le sami o le malo o Niu Sila.
O le afiafipo o le Aso Sa na faailoa ai e le Sui Palemia le afioga Tuala Tevaga Iosefo Ponifasio, i sana saunoaga faalaua’itele i le atunuu le faia ai nei o feutana’iga ma le malo o Niu Sila i le faatinoina o galuega uma mo le puipuia o le tatou gataifale mai le ono masaa o se suāuu mai lea vaa, ma faaleaga ai le si’osi’omaga o meaola uma o le sami.
E lē o iloa i le taimi nei le mafuaaga o le pa’ulia o le Manawanui, ae o le masina o Me o le tausaga nei na afea ai ogasami o le tatou atunuu e lea vaa o le fitafita o le sami o le malo o Niu Sila, mo ni su’esu’ega o le gataifale o le tatou atunuu.
Na faasaoina uma le auvaa e to’a 75 i se galuega lavea’i a le vaega o le tineimu ma galuega fesoasoani i le taimi o faalavelave tutupu faafuase’i, faapea le matāgaluega o leoleo, falepuipui ma le toe fuata’ina.
Le afioga i le Sui Palemia, Afioga Tuala Tevaga Iosefo Ponifasio.
O loo i Samoa le auvaa o le HMNZS Manawanui, a o faia ai galuega mo le puipuia o le gataifale o le atunuu i le ono aafia i ni suāuu masaa mai le vaa ua goto nei i gataifale i Saute o Upolu.
O le aso 28 o Setema na tuua ai le taulaga o vaa i Devonport i Niu Sila e le Manawanui ma aga’i mai ai i Samoa.
