E leai se faaletonu o le mafaufau o le tamaitai 24 tausaga na saofia ona malaga ese ma Samoa ma taunuu i Nadi i Fiti i le Aso Toonai 24 o Tesema.
Ua faailoa lea tulaga e le Komesina o leoleo ma ia faailoa ai ua tuuina atu se faamatalaga a le tamaitai i suesuega o loo faagasolo, ma ua faailoa ai e le tamaitai sa iai lona faamoemoe e malaga i Ausetalia.
Ua faamaonia mai foi e le Komesina le susuga Auapaau Logoitino Filipo, sa tauave e le tamaitai lona tusifolau, ma lana tala na fai i lona aiga e alu ma lona tusifolau e faamaonia ai le talaina i tua o lana tupe faamomoli mai fafo i le auaunaga a le Western Union o loo i le malaevaalele i Faleolo.
O le aluga lea e tala lana seleni na sao ai i totonu o le vaega e agai iai pasese e malaga ese ma Samoa, ma ulufale ai i le vaalele e aunoa ma le silafia e i latou o loo siakiina tusifolau ma isi pepa malaga.
O le vaiaso nei e pei ona faailoa mai e Auapaau Logoitino Filipo e tatau ona mae’a ai le suesuega a leoleo ma iloa ai ni moliaga.
