O tama aoga e toatolu e i le va o le 15-16 tausaga le matutua ua molia nei i le faaoolima i le mae’a o se osofaiga i se talavou mai se isi aoga.

O le mataupu lenei e pei ona lipotia e le NZ Herald na tupu i le masina o Fepuari i le tausaga nei lava, fai mai pe ā ma le 10-15 talavou mai le Kolisi o Magele na aofia ai i le osofaia lea o se tama aoga mai Marcellin College ina ua toe foi atu i lona aiga i Magele.

Ta’ua i le lipoti sa molimauina le osofaia o lea tamaitiiti e se vaega toatele foi o isi tamaiti aoga na o latou pueina videos. O le tama aoga Marcellin sa avatu i le falemai i le mae’a o le osofaiga lea ina ua fesoasoani ane iai se ulugalii na o la iloa ane le faalavelave.

O le faamatalaga a leoleo o le toatolu ua molia ua tuuina atu i le Youth Aid ma e matuai leai se avanoa e taliaina ai ni tulaga sauā e pei ona tulai mai aemaise sa faatino i nofoaga  faitele.

Faailoa e leoleo o i latou sa faatinoina lenei gaioiga o le a feagai ma se faaiuga e faia iai.

Talu mai le faalavelave lea ua mae’a faatinoina fonotaga a le komiuniti ma leoleo faapea foi ma aiga sa aafia ai ma e talitonuina e pei ona ta’ua i le lipoti ua mae’a foi ona feiloai i latou ia e soalaupule ma toe teuteu le mataupu.

Fai mai le sui pule o le Kolisi o Magele o le mataupu ua i lima o leoleo ma ua mae’a foi ona talanoa ma le pule o le kolisi a Marcellin.