E 13 pagota ua auai i se aoaoga ua autu i le tāua o le saogalemu o taumafa o loo faatautaia e le aoga o matata eseese a Ausetalia le APTC.

Ua mafai ona faatino lea aoaoga ona o se maliega ua sainia e le pulega o falepuipui ma le ola toe fuataina ma le kolisi o matata eseese a Ausetalia o loo i Samoa.

O se uluai aoaoga lea i le saogalemu o taumafa ua faia i totonu o le falepuipui i Tanumalala ma o le a maua ai e pagota o loo auai se tomai e mafai ona latou faaaogā pe a mae’a tuli o latou faasalaga.

O le masina foi o Me o le tausaga nei na faatino ai se isi aoaoga i se maliega foi ma lea kolisi o matata eseese i le autu lava e tasi ia maua se avanoa o le au nofosala e saili ai nisi tomai e faaaogā mo lo latou lumanai pe a foi i aiga ma nuu ua mae’a le faasalaga.

O le vasega o loo aooga i le saogalemu o taumafa o le a faauu i le vaiaso asau ma o le a auai nisi o o latou aiga e molimauina lea laasaga tāua ua latou ausia a o feagai ai ma le tuliina o faasalaga.