E ono iai le avanoa e faatalosaga ai le tina ua molia faasaga i auivi o fanau na maua i atopau, o lea sa iai aafiaga tau i le maloloina o lona mafaufau.
O le aso ananafi na sau ai tala ua maua ma o lea ua molia i le fasioti tagata le tina Korea 42 tausaga, ma e faapea e maua o loo lafi ma le tala e le o ia na faia.
A o taofia ai i lalo o vaavaaiga a le tulafono a Korea i Saute, ua faamautinoa mai e leoleo Niu Sila o lea ua talosaga i le mafai e aumai ai le ua molia i Niu Sila e tali i ona moliaga.
O lea faatoa tasi le masina ma nai aso talu ona maua e le aiga Aukilani i Saute auivi o fanau e toalua i totonu o atopau na maua atu i le faatautu’i, ma ua faafetaia ai e leoleo Niu Sila le fesoasoani a leoleo i fafo ua vave ai.
A o fiafia ai la i le manuia o suesuega a leoleo, ae ua taatia atu nei i le faamasinoga a Korea i Saute e faia le faaiuga, ma e masalo o totonu o le lua masina e tatau ona maua mai ai se tali.
Ae i lipoti a le Newshub, o lea na iai aafiaga tau i le mafaufau o le ua molia i le taimi na tupu ai, ma e ono mafai ona tetee lea tina e aumai ia iinei ona o lea mafuaaga.
Pe a tuu atu foi ia Korea i Saute, e iai le talosaga faapenei mai Amerika na ia teena i le 2020 e faatatau i le tama na faamaonia ona moliaga o le faasalalau o feusuaiga le manuia.
Peitai o nei itu uma, e le mafaatusalia i le mataupu lenei, ma o loo mafanafana le polofesa o mataupu tau le tulafono a le iunivesite a Canterbury, e manuia le talosaga a leoleo Niu Sila, ina ia toe faafoi mai iinei lea tamaitai e tali i ona moliaga.
