O loo faaauau mai pea i le asō ona tapunia aoga, motusia le eletise, malolosi ma tō faata’uta’u savili faapea timuga i matu i saute I sasae o Kuiniselani faapea New South Wales ona o le afa o Alfred.
E ui o lea ua suia i le vaega 1 poo le category 1 le faatulagaina o le malosi o Alfred, o loo ripotia mai le faaauau pea ona mafatia le toatele i savili malolosi faapea timuga ua lolovaia ai le tele o nofoaga maualalalo.
Tuufaatasia tala o le taeao ua silia ma le 295,000 fale o aiga i saute i sasae o Kuiniselani ua motusia eletise ae 42,600 i Niu S Uelese.
Ta’ua o se fuainumera tele lea ua faamauina i tala faasolopito o Kuiniselani ua aafia ona o mala faalenatura, e tusa lea ma le 750,000 tagata aafia ona o le leai o se eletise.
O loo faaauau pea ona leai ni aoga, ma ao faaauau ai galuega laveai a le aufaigaluega, taua mai ananafi le lavevea o loli e lua a le Defence Force I New South Wales ananafi, manunua ai le tusa ma le 36 ma o nisi e tigaina.
Fa falemai na faasoa iai tagata manunu’a na aafia i le faalavelave lenei.
Ese mai lapataiga mai puleganuu ma pulenuu taitasi, o lea foi na fautuaina ma tuualalo le Palemia o Ausetalia Anthony Albanese i tagata e ‘aua nei manatu māmā i lo latou saogalemu, e tusa ai ma le ona lamatia o se soifua ona o uiga louloua o le tau o loo feagai nei ma lea itu o le atunuu.
Puna o Faamatalaga: https://www.rnz.co.nz/news/world/544302/ex-tropical-cyclone-alfred-many-schools-still-closed-as-clean-up-begins
