O Samoa lea o le a talimalo i le World Rugby Pacific Challenge ile tausaga nei.
O le pepa o faamatalaga mai le ofisa autu o le Lakapi Samoa i Apia ua faamaonia mai ai lea tulaga ma o le uluai taimi lea ua toe amatalia ai lea taamilosaga talu mai le 2020.
E taaalo ai ‘au, A teams a atunuu e pei o le Fiji Warriors, Junior Japan, Tonga A ma le Manuma Samoa ma o le aso 3-13 o Me o le tausaga nei o le a faataunuuina ai.
O le taamilosaga e faatupeina e le World Rugby ma o le uluai tausinioga faavaomalo foi lea o le lakapi ua talimalo ai Samoa i totonu o le 13 tausaga.
Saunoa ai le Ofisa Sili o le lakapi Samoa, Faleomavaega Vincent e faafetaia le World Rugby mo le avanoa aemaise ua nofo sauni foi e talimalo i uso taaalo mai Iapani, Tonga ma FIti.
O ‘au uma i lenei taamilosaga lea e ta’i toa 28 tama taaalo i le ‘au, ae e tatau ona toa 23 tama taaalo ia ta’i 23 pe i lalo ifo tausaga le matutua ia lē silia le aso 3 o Me, 2023, a o isi tama e toalima e totoe ai, e lē afaina pe fia tausaga o lo latou matutua, ae ia i laga atu o le 18 tausaga le matutua.
O le uluai taaloga a le Manuma Samoa i le taamilosaga lea e fetaui ai ma Tonga A i le aso 3 o Me i le malae taalo i le Apia Park.
