O le osofaiga a leoleo i Toamua uta ia Me o le tausaga na te’a nei lea na maua ai nakoti o le aisa ma maruana faapea paipa e fesootai i le faaaogāina o le aisa, ua faamaonia nei moliaga o Vincent Patelesio Smith o lona umia o le aisa ma se fana laititi o le ituaiga o le 99 milimita pistol, a o Laki Junior Silva ua faamaonia lona umia o sikaleti maruana e lua.
O tamaitai o Victoria Kalapu ma Sharlene Fidow sa molia faatasi ma ia alii e toalua ua saoloto ina ua lē mafai e leoleo ona faamaonia o la moliaga o le umia o nakoti poo fualaau faasāina.
O le Aso Gafua na aumai ai lea faai’uga a le faamasino o le faamasinoga sili le susuga Leiataualesa Darrel Clarke ina ua mae’a ona suesueina mau a leoleo sa tuuina atu e lagolago ai moliaga.
O le osofaiga lea a leoleo i Toamua uta na mafua ai se finagalo o alii ma faipule o le afioaga o Toamua na tu ai le tootoo ma faasā se isi o i latou na molia ona toe vaaia i le nuu.
O le fale ma le fanua sa agai iai le osofaiga a leoleo o se meatotino o loo i se fanua umia saoloto, peitai na faaalia e matai o le afioaga i le taimi na tulai mai ai lea solitulafono, o le mafuaaga o le finagalo o matai o le nuu o le puipui i ona tupulaga mai le aafia i nakoti poo fualaau faasāina.
Ua faatulaga e le faamasinoga le Aso Faraile 26 o Iulai i le ‘afa o le 12 i le aoauli e aumai ai se faasalaga o Vincent Smith ma Laki Junior Silva, ma o loo faaauau ona tatala i laua i tua i aiaiga e faatali ai so la faasalaga.
