I le 20 o tausaga talu ona talia ma avea Samoa ma se tasi o atunuu e lagolagoina le feagaiga faavaomalo mo le puipuia o aiā tatau o tagata e iai aafiaga tumau o le soifua, ua telē le sao o le malo i le tausisia o aiaiga o lea feagaiga e pei ona faailoa e le Faatonu o le faalapotopotoga o le Nuanua o le Alofa, o se auaunaga tuma’oti o loo feagai ma polokalame mo le atina’e o tagata e iai aafiaga tumau o le soifua i Samoa.
E ui ina telē le sao o le malo peita’i ua faaalia e le Faatonu o lea faalapotopotoga tuma’oti le susuga Matā’afā Faatino Masunu Utumapu, o loo iai pea le mana’omiaga i le faaleleia atili o le lagolago a Samoa i le faamalieina o aiaiga o le feagaiga faavaomalo o loo puipuia ai aiā tatau o tagata e iai aafiaga tumau o le soifua.
O loo iai nei i le aai o Niu Ioka i Amerika le Faatonu o le Nuanua o le Alofa mo le fonotaga a Malo Aufaatasi mo atunuu o loo avea ma sui o lea feagaiga, lea sa faamanuiaina ai le susuga Matā’afā Faatino i le filifiliga o sui mo le komiti a Malo Aufaatasi e māta’itūina aiā tatau o tagata e iai aafiaga tumau o le soifua, ma sa maua ai se avanoa e fesiligia ai i se faatalanoaga i auala o fesoota’iga faatekonolosi.
Le talanoaga ma le Faatonu o le Nuanua o le Alofa ua avea nei ma sui o le komiti a Malo Aufaatasi e māta’itūina aiā tatau o tagata e iai aafiaga tumau o le soifua, susuga Matā’afā Faatino Masunu Utumapu.
O le fonotaga i Niu Ioka i Amerika o loo ta’ita’ia ai le usugafono a Samoa e le Minisita o le Matāgaluega o Tinā ma Tama’ita’i, Atina’e o Afio’aga ma Aga Fesoota’i, le afioga Moefaauouo Julius Ah Kui Tafuna’i.
O Samoa ma le atunuu o Palau o le taimi muamua lea ua filifilia ai ni ona sui i le komiti a Malo Aufaatasi e māta’itūina aiā tatau o tagata e iai aafiaga tumau o le soifua.
