Ua toe tolu aso o lumana’i nei ona tulaueleele lea i Samoa o le ulua’i malaga a le kamupanī vaalele o le Qantas a Ausetalia e tuua ai ai Aukilani, ma o le taimi muamua lea ua tuusa’o mai ai i Samoa mai Niu Sila se malaga a lea kamupanī vaalele tele i le Pasefika ma le lalolagi, ma o le a tauva ai ma le kamupanī vaalele a le Niu Sila o loo tautua to’atasi i le taimi nei i malaga mai Aukilani mo Apia.
O le Aso Lua o le vaiaso a sau le malaga muamua a le Qantas i lona ālavaa fou, e ese ai ma ana malaga o loo tautua ai i le va o Ausetalia ma tuusa’o mai i Samoa.
E tolu malaga a lea kamupanī vaalele mai Aukilani mo le malae vaalele faavaomalo i Faleolo i le vaiaso.
O Aso Lua, Aso Tofi, ma Aso Toonai.
A o tulimata’i ai le amatalia o malaga a le Qantas mai Niu Sila mo Samoa, ua faailoa i se lipoti le faailoaina e le tasi o kamupanī vaalele a Ausetalia le Virgin Australia, o le faamuta o ana malaga aga’i mai i Samoa i le ogatotonu o le masina o Aokuso o le tausaga nei.
I le lipoti a le vaega faasalalau o le MerMada Pacific o loo ta’ua ai ua māfua lea faai’uga a lea kamupanī vaalele ona o tulaga siitia o le tau o suāuu ma penisini ma ua faigatā ai ona faaauau lea tautua ona o fuafuaga mamao a le Virgin Australia.
