Ua molia e leoleo se alii 42 tausaga le matua mai Salepoua’e Saleimoa i le moliaga o le fasioti tagata faamoemoeina, ina ua maliu ai se alii 56 tausaga le matua o Salepoua’e lava i le faaiuga o le vaiaso na mavae nei.
Na faamaonia mai e le komesina o leoleo, Auapaau Logoitino Filipo o se inuga ava malosi sa fai a nei alii e toalua ma sa tulai mai ai se feeseeseaiga i le va o i laua ia.
Na tu’i e lē ua molia lē ua maliu ma pa’ū ai i lalo ma faaauau loa le faaoogalima a lē ua molia a o taatia lē ua maliu i lalo.
I lipoti e faapea na alu ese lē ua molia, peitai o le taeao na sosoo ai na iloa ai e lē ua molia o loo taoto mai lava lē ua maliu, ma taumafai loa e ave lē ua maliu i le falemai, peitai na maliu lava lea alii i luga o le ala.
O loo taofia le alii 42 tausaga e faatali ai le aso 19 o le masina nei e tulai ai i luma o le faamasinoga.
