Ua faailoa lautele e le pulega o le kamupani vaalele o le Samoa Airways le sainia ai nei o se maliega ma le kamupani Ausetalia o le Australia based Aero Adapt, o le a avanoa ai ona galulue faatasi lea kamupani mai fafo ma le kamupani vaalele a Samoa i le faatinoina o galuega o le vaaia o uta i le taimi o le taligamalo a Samoa i le Fono a Malo o le Taupulega.

O se galuega o le a tuu atu le pulea ma le vaaia o uta uma e taunuu mai i le taimi atoa o le fonotaga.

Faaalia e le Samoa Airways o se taimi tāua tele lea i le tautuaina o le to’atele o tagata o le a malaga mai i le atunuu mo lea fono faavaomalo, ma e tāua tele ai le vaaia lelei o uta a tagata malaga.

O le a lē aofia i lea maliega le tautua masani a le kamupani vaalele a Samoa mo ana paaga masani e pei o malaga a vaalele o le kamupani vaalele o le Qantas, Air New Zealand, ma le Fiji Airways.

Ua iai le talitonuga o le Ofisa Sili o pulega o le Samoa Airways le afioga Fauo’o Tauā Fatu Tielu o le faigapaaga e ala i le maliega ua sainia ma le kamupani o le Aero Adapt mai Ausetalia, o le a tufa atu ai i le aufaigaluega a le kamupani vaalele a Samoa tomai ma agavaa aemaise o le silafia o tagata faigaluega o lea kamupani e faatino ai le auaunaga mo le vaaia ma le pulea o uta a vaalele e taunuu ma malaga ese ma Samoa i le taimi o le Fono a Malo o le Taupulega i le masina o Oketopa.