O loo taamilo nei i le atunuu le galuega a le komiti faapalemene ua toe silasila i teuteuga o le Faavae ma le Tulafono o Faamasinoga o Fanua ma Suafa 2020, i le faamoemoe e aoao manogi mai finagalo o le atunuu i ni itu e saga faaleleia atili ai ia teuteuga, aemaise o ni itu e lē talia ai.

O le ta’ita’ifono o lea komiti faapalemene o le afioga i le Sui Fofoga Fetalai ae o ona sui o le komiti o nisi o faipule o le Palemene ua filifilia iai.

O taualumaga a le fono aoao faitulafono i le masina o Aokuso na pasia ai i le faitauga lona lua teuteuga fou o le faavae 2024 ma teuteuga o le tulafono o Faamasinoga o Fanua ma Suafa o le tausaga 2024.

Peitai o le toe foi atu o teuteuga i tulaga faakomiti ua ave ai le galuega i itumalo e maua ai le avanoa o le to’atele e faaali o latou finagalo.

O se galuega foi faapea na faatino i le tausaga e 2020 na malaga ai foi le komiti faapalemene sa iai i lea taimi e saili ni finagalo o le atunuu a o malomaloā finagalo ma manatu i le fausia ai o le tulafono fou o faamasinoga o fanua ma suafa 2020 ma teuteuga foi o le faavae 2020 na pasia e le Palemene ia Tesema o lena lava tausaga.

O le Aso Lulu o lenei vaiaso ua oo atu ai lea galuega i le itumalo o Sagaga 1, 2, 3 ma Sagaga 4 faapea itumalo palota o Aana Alofi 1, 2, 3, ma Aana Alofi 4.

O le Aso Gafua o le vaiaso nei na amata ai lea galuega i le motu o Upolu lea na afea ai itumalo palota o Anoamaa 1 ma Anoamaa 2, o itumalo palota o Vaa o Fonoti, Aleipata Itupa i Lalo ma Aleipata Itupa i Luga faapea Lepa ma Lotofaga.

O le Aso Lua na afea ai Falealili 1 ma Falealili 2, o Siumu, Safata 1 ma Safata 2, faapea Lefaga ma Faleaseela.