O le aso muamua na faagasolo ai le galuega a le Komesina ma le ofisa o le komisi o faigāpalota e lesitala sui tauva mo palota laiti e tolu ua faatulaga mo le aso 13 ma le aso 15 o le masina fou o Setema, ua iai nisi sui tauva ua molimauina ua faaopoopo i le toaono o sui faatutū ua mae’a faailoa lautele lo latou sauni mo lea faiga filifiliga.

O le itumalo palota o Siumu e toalua sui tauva mautinoa o le tofa Tu’uu Anasii Leota ma Tu’uu Amaramo Sialaoa, ae e iai le sui tauva faaopoopo e faatoa mautinoa le pati faaupufai e tauva ai, pe tauva faatutoatasi pe a oo ina tapunia le lesitala o sui faatutū i le Aso Faraile le faaiuga o lenei vaiaso.

E faapena foi le itumalo o Vaa o Fonoti e iai le isi sui tauva faaopoopo e ese mai le tofa ia Mau’u Siaosi Puepuemai ma le tofa Leausa Dr Take Naseri.

E faatoa manino foi faamatalaga uma i lea sui faaopoopo pe a tapunia le lesitala.

O le itumalo o Faleata 4 ua manino sui tauva e toalua o le tofa Ale Vena Ale ma le tofa Ulu Bismarck Crawley.