O le afio atu o le afioga i le Ao o le Mālō i le Malae i Tiafau i le taeao nei i le aso lona lua o le fonotaga a le Palemene o le ala lea o le oo atu o le Palemia Fiame Naomi Mataafa ma le Fofoga Fetalai Papalii Li’o Taeu Masepau i le maota o lana afioga i Vailele pe iai se mafuaaga i lona oo atu i Mulinuu.
Taua e Fiame “Ua lagona le popole o le Ao o le Mālō faatasi ai ma le sui ao ina ua vaai atu ua tau iai se faavesivesi o le va i le vaega faaupufai a le HRPP ma leoleo e tusa ai ma le puipuiga foi o le maota fono ona o le poloaiga a le Fofoga Fetalai”
Na ia taua foi ua maea ona faamafanafana i le Ao o le Mālō ma o loo to’a lelei pea ma e lelei lava le taatia atu pea o le va o i latou o sui o le atunuu e faapena lava tulaga o feeseeseaiga faaupufai ao loo tapasaina lava mea uma e le tulafono.
Na saunoa foi Fiame ma Papalii i tulaga o le lē faatautoina o sui o le HRPP ona e iai mafuaaga sa folasia e tusa ai ma fetusiaiga.
O le finagalo o le Ao o le Mālō ina ia tausi le filemu ma nonofo lelei o le atunuu.
Taua foi e Fiame “E leai se mea o tupu o finauga lava i luga o tulaga pei sa faasolo mai ai i le 4 masina talu ai atonu o loo sosolo ai pea i le tulaga lena sau se malama sa tatou tua uma lava i le tulafono”.
