O le asō na faataunuu ai le faatautoga aloaia o le Sui Komesina o Leoleo, Papalii Monalisa Tia’i-Keti, le Sui Komesina Lagolago (AC) Galumalemana Eneliko Ta’eu ma le Taitai Leoleo Asiasi ia Apaula Ta’eu e avea ma nisi o loia taualoa o le atunuu.
Māua e le Radio Samoa nisi o faasalalauga ma saafiafiga a nisi o le mamalu o le atunuu faapea sui o le Matagaluega o Leoleo mo i latou nei e tusa ai ma a latou taumafaiga, aemaise o le ausia ai o se isi matati’a i lo latou ola auauna i le atunuu.
O le afioga i le Faamasino Sili, Satiu Simativa Perese na faatautaia le faatautoga, ma na mafai ona molimauina ma auai le Loia Sili, Su’a Hellene Wallwork. Faasoa le alii Faamasino Sili ia i latou nei i le tāua o le latou matafaioi, aemaise o lea ua avea ma loia i le Faamasinoga Maualuga a o avea ai ma sui o le Matagaluega o Leoleo.
Molimauina foliga o le fiafia i le faataunuuina o lea faamoemoe tāua aemaise le sagiagi fiafia atu o aiga ma uo e patipatia taumafaiga auā le tautuaina o Samoa.
