Ua talia e le susuga i le faipule filifilia o Aana Alofi No.2 le afioga Aiono Afaese Toleafoa o le sui o le HRPP le finagalo o lē na tagi o le sui o le FAST ia Lolomatauama Eseta Mataituli ina ia faamavae mai lona tofi faipule ae toe foi e fai le faigapalota laititi. Ae le gata i lea ua faamaonia mai e lē toe alu Aiono Afaese i le faigapalota laititi pe a toe fai.
Na faia lenei faaiuga a Aiono i nai minute a’o sauni e amatalia le faamasinoga. Taua e Aiono ma le maligi o loimata o le ala na auai ai i le faigapalota ona o le fia tautua i lona itumalo tusa lava poo le a le vaega faaupufai e tauva ai.
O le talosaga a Lolomatauama afai ae lē faamavae Aiono ma lē toe nofo mai le faigapalota laititi e leai se maliega e tulai mai. Na ia faamanaino foi se tasi o faafitauli na tulai mai i le faigapalota tele e faapea “toatele o tagata e lē nonofo i le itumalo ae o lea lava na fai a latou palota”.
O lea na talia ai loa e Aiono le mana’o o Lolomatauama.
I fafo ane o le potu faamasino na taua ai e le tamaitai Loia o loo tulai mo Lolomatauama le afioga ia Fuimaono Sarona Ponifasio “O le ua tolopo lenei mataupu seia aulia taeao le Aso 13 o Iulai a’o taumafai e faamautu sainigalima faapea le tusi faamavae a Aiono”.
Taua foi e Fuimaono “E na’o Aiono lea e lē toe alu i le faigapalota laititi pe a toe fai ae mafai lava ona toe tauva le afioga ia Lolomatauama.”
