I le 25 o atunuu o le lalolagi ua mae’a ona faamautū sootaga faavaomalo ma le malo o Samoa, o lea ua faaopoopo se isi malo ma ua maua ai nei le 26 o atunuu ua tatou o si feagaiga i tulaga faavaomalo.
O lea ua faailoa e le ofisa sooupu o le tatou malo o le Aso Lua o le vaiaso nei 25 o Fepuari na faamautū ai sootaga faavaomalo o Samoa ma le malo o Belize o se atunuu i Amerika Tutotonu poo Central America e lata i le atunuu o Mexico.
Sa igoa muamua lea atunuu o British Honduras, ma o le fono a malo o le taupulega sa talimalo ai lo tatou atunuu ia Oketopa o le tausaga na te’a nei sa auai ma le usugafono mai lea malo.
O le sui o le malo o Samoa i totonu o Malo Aufaatasi, le afioga Fatuomanava o Upolu Dr Pa’olelei Luteru ma le amepasa o le malo Belize i Malo Aufaatasi o Carlos Fuller sa o la sainia i le ofisa o le malo Belize i le aai o Niu Ioka i Amerika pepa e faamautū ai ia sootaga faavaomalo.
Ua faailoa i faamaumauga ua na o le atunuu o Belize i Amerika Tutotonu e to’atele ona tagata e faaaogāina le gagana Peletania.
