Toe 7 masina faataunuu le Fonotaga a Taitai o Malo o le Taupulega, ma e lē o nofoa’i Matagaluega ma Pulega tuma’oti a le Malo ia latou tapenaga.

O le Pulega a le Tineimu ma Faalavelave Tutupu Faafuasei o se tasi lea auaunaga tāua a le malo, i tulaga tau saogalemu o soifua maloloina o tagata ma fesoasoani e tali atu i taimi e tutupu ai faalavelave faafuasei.

Ma e moomia foi le pulega amata atu lava i le taimi lenei seia oo ina faagasolo le Fonotaga a Taitai o Malo o le Taupulega.

I le faatalanoaga a le Komesina o le Pulega o Tanuvasa Petone Mauga ma le TV1 na manino ai nisi o a latou tapenaga aemaise ai vaega e manaomia pe a faagasolo le fonotaga.

Na lipotia le talosagaina lea e le pulega o ni alii ma tamaitai e 20 mai i Ofisa o Tineimu a Niu Sila ma Ausetalia e iai le tomai e galulue ai i totonu o taavale ave ma’i e tuu mai lo latou tau’au e fesoasoani i le pulega a le atunuu i le taimi o le fonotaga.

O lea auaunaga e lē soona tofia iai soo se tasi, ae ua na o i latou ua iai le tomai ma le agavaa e mafai ona fesoasoani iai ina ia mautinoa e leai se faalavelave e tulai mai i se soifua o se tagata.

E toa 200 le aofai o le aufaigaluega a le Pulega e aofia ai ma le toa 150 o alii ma tamaitai fuimu.

Peitai o loo manaomia se isi toa 50 ma ua mae’a pasia e le Komisi o Tagata Faigaluega a le Malo le faasalalau lea o nisi avanoa e 50 ina ia maua le fuainumera o le aufaigaluega e manaomia.

E lē gata i lea ae o loo iai foi i latou ua ofo atu la latou auaunaga ofo fua ua mae’a faatino aoaoga e vaavaalua ma le Pulega.