‘E iai le avanoa o le Komisi o Galuega a le Malo e mafai ai ona saofagā i le faaaogāina o meatotino a le Malo, e pei ona aveesea ai le hard drive o le masini computer a le Faatonu sili o le soifua maloloina,’ o le finagalo lea o le Minisita o Soifua Maloloina ina ua fesiligia e ni tusitala i fafo o le maota fono o le Palemene i le Aso Lulu.

O le gaioiga na faatino e le Komisi o Galuega a le Malo le PSC, na faia a’o toesea i atunuu i fafo le faauluuluga o lea matagaluega. Ua lipotia e le vaega faasalalau o le Talamua, o le finagalo foi o le Minisita le afioga Valasi Luapitofanua Toogamaga Tafito Selesele na ia teena ai lipoti e faapea o loo aafia le Faatonu sili le tofa Leausa Dr Take Naseri i le suesuega a le komisi i le mataupu i le masini fā’ata le CT Scanner e siaki ai gasegase. O loo ave aso malolo poo livi o le Faatonu sili e pei ona faaalia e le Minisita, ma e toe foi i lana galuega a’o lei mae’a lana konekarate i le aso 22 o le masina nei o Me.

O le faaiuga o le masina nei e faamuta ai le avanoa mo nisi e talosaga i le avanoa o le Faatonu Sili Aoao o lea matagaluega tele a le Malo.