E leai se silafia o le afioga i le Fofoga Fetalai Papalii Li’o Taeu Masepau i le faia ai o suiga e le Komesina o Faigapalota i aso o le faigapalota laititi a itumalo e 7 ua faatulaga mo le masina fou.
Ua faaalia e Papalii i le vaega faasalalau a le Talamua afai o ni suiga i aso o lona uiga o se faaiuga a le Komesina o faigapalota e mafua o i aiaiga faaletulafono. O le Aso Tofi na tea nei na toe aumai ai le faasilasilaga i le suia o le aso o palota muamua i le Aso 24 o Novema ae o palota laiti o le Aso 26.
I le taoto mai ai o aso Ua atofa mo ia faigapalota laiti lea ua amata taaloga ma faalauiloa o faatosina o vaega faaupufai i o latou sui faatutū ua tapena mo
lea faamoemoe.
O le faaiuga o le vaiaso i le Aso Faraile na tea nei na feiloai ai le taitai o le vaega e Puipuia Aiā Tatau o Tagata Tuilaepa Lupesoliai Sailele Malielegaoi ma nisi o lana pātī faaupufai ma nisi o sui o tagata palota o le itumalo o Sagaga No.4. Faaalia e se molimau faatuatuaina o se feiloaiga ua amata ai ona savalia e le HRPP nuu o itumalo e 7 na manumalo mai ai o latou sui faatutū i le palota tele ia Aperila ma o le vaiaso nei e faaauau ai nei faalauiloa.
O le faaiuga foi o le vaiaso na tea nei na feiloai ai sui faatutū o le Faatuatua i le Atua Samoa ua Tasi ma sui lagolago i lo latou api i le Maota Samoa I Vaitele e faamautu ai o latou sui tauva ma o se faatasiga na auai ai taitai ma sui mau tofi o le faafaletui a lea vaega faaupufai.
