E silia ma le 60 galuega o le a lē toe iai a le Callaghan Innovation a o toe faatulaga ai lea auaunaga i lalo o poloa’iga a le malo.

O le masina talu ai lea na fofola mai ai lenei fuafuaga lea e faamuta ai nisi o galuega ae tuufaatasi nisi o auaunaga ma le Public Research Organisation, poo le faalapotopotoga lea e tuufaatasi i totonu o le isi 12 i le 18 masina.

Na lipotia e le leitio faavaomalo a Niu Sila, o lea lava na faamautinoa mai e le minisita o su’esu’ega faasaienisi Shane Reti, o le aso 30 o Iuni lea e faamuta ai le faatupeina o nisi o vaega o le auaunaga.

I le taimi nei o avanoa faigaluega e 63 o le a aafia o lea lava e faagasolo pe fia o le a faamuta, ae fia foi e tuufaatasi ma nisi o galuega fesoota’i, ma o nei fuafuaga uma o loo faasolo pea iloiloga.

Ae mai le iuni a le PSA, ua ia tuua’ia le malo i lenei vāea ma le tala, o suiga nei o le a atili faamalosia ai le aga’i i atunuu i fafo o tagata nei e gafa ma su’esu’ega faasaienisi.

Puna o Faamatalaga: More than 60 jobs to be axed at Callaghan Innovation | RNZ News