Ua iai le atunuu i le tau o lāmala ona ua faaitiitia timu e tolu ma ua mago ai ma mātūtū le eleele.
O le matagaluega o puna’oa faalenatura ma siosiomaga o loo iai i lana vaaiga le auaunaga a le ofisa vaaitau, e pei ona faailoa e le matagaluega le iai o nisi o vaega o le atunuu ua matua’i faaitiitia le suatimu i totonu o le 6 ma le 12 masina talu ai.
O le tali atu i ia fesuia’iga ua faailoa e le matagaluega e tatau i le atunuu ona faatino gaioiga talafeagai e tuuitiitia ai aafiaga o le faaumiumi ona lē maua o se suatimu.
O le gaioiga e ao ona faia o le ‘aloese mai le susunuina o lapisi ma le faia o tafuna’i ona o le tulaga lamatia i mu o le togavao.
Ua fautuaina foi lo tatou atunuu ia fuafua tatau le faaaogāina o le suavai.
O nofoaga apovai poo water catchment areas ua afaina ona ua faaitiitia le suatimu, ma o loo mata’itū nei e le matagaluega tulaga ogaoga e ono oo iai, pe afai lava e faaauau tulaga i mugalā o iai nei e aunoa ma le maua o ni timuga.
