O loo faatupula’ia pea le lē fiafia o tagata faigaluega i le soifua mālōlōina, o i latou o loo faatalitali pea i le toeitiiti 2 piliona o totogi o aso mālōlō poo holiday pay, lea na maua e le’i sa’o ona totogiina.

O le 2016 na iloa ai o fono faatonu sa iai, e le’i sa’o ona o latou faia totogi o le aufaigaluega talu mai le 2010.

O lenei mataupu lavelave ua fai si faatuai o lona faagasologa ona o le to’atele foi o le aufaigaluega.

Fai mai le 1News e 220 afe tagata faigaluega, tusa e 130 afe tagata sa faigaluega i le soifua mālōlōina ma le 90 afe o loo galulue pea i le auaunaga, o i latou uma ia o loo aofia i le mataupu.

I se pepa o faamatalaga mai le Health NZ, ua faailoa ai e se tasi o sooupu, Fiona McCarthy o latou o loo maumaua’i ina ia faatino peimeni ia i se taimi vave ma o loo galulue nei i se faiga e vave ai ona faamatuu ane ia peimeni.

Fai mai o nisi faaitu e pei o Aukilani ua mae’a ona maua peimeni a isi ae o loo faatali pea isi ona e lē faigofie le faatinoina o le galuega ona o le to’atele.

O le folafolaga aupito lata mai ua tuuina ane ua faailoa ai o le aufaigaluega o loo iai i le taimi nei o le a totogiina a o le’i oo ia Iulai ae o le aufaigaluega sa iai muamua o le a totogiina a o le’i mae’a le 2025 ma e lata i le 1.8 piliona ua faaagaga mo lea fuafuaga.

Puna o Faamatalaga: https://www.1news.co.nz/2025/01/07/frustration-for-healthcare-workers-waiting-on-owed-holiday-pay/