O le aso ananafi na molimau ai e fanau, aiga ma uo toe sauniga o le tamalii ia Leati Sika Anoa’i, o sē ua iloga ma lauiloa i le taaloga o le piiga poo le wrestling i Amerika.  

Na faapea ona iai lona atalii ia Leati Joseph Anoa’i poo Roman Reigns e iloa ai e le toatele i sauniga uma o le tamā ia Sika.  

Na maitauina le auai atu ai o nisi o i latou sa auai i le tele o tausaga i le taaloga o le piiga e pei o le alo o le atunuu ia Rikishi.

I le talaaga o lenei tamalii, o Polaivao Leati Sika Anoa’i na fanau i Tutuila Amerika Samoa i le tausaga 1945, ma na ola a’e i le motu i Sasa’e, ae o le 14 o ona tausaga na agai ai ma si ona aiga i Amerika i le aai o San Fransisco i Kalefonia. 

I lona olaga taumafai i le taaloga o piiga poo le wrestling, sa faapena ona ia auai faatasi a ma lona uso, Afa Amituana’i “Arthur” Anoa’i ma ua avea ai ma nisi iloga i Amerika.

I le auai o Sika i lea taaloga ma tuufaatasia le la ‘au poo le paga e ta’ua o le Wild Samoans na amata mai le tausaga e 1973.

Mo le tele o tausaga sa avea Sika ma Afa ma siamupini i taaloga faipaga poo le tag team e pei ona faamauina e 21 lelei siamupini i lo la taimi a o taaalo faapolofesa ai i lea taaloga.  

Ma i le telē o le sao o lea alii ma lona uso ia Afa na filifilia ai i laua e auai atu i le lisi o tagata iloga ma taualoa i le WWE e pei ona amana’ia ai i laua i le WWE Hall of Fame, i le tausaga 2007.  

Ua faaalia foi le mata’ina o le sao o Sika ma lona uso ia Afa, ona i talaaga o i laua nei, na amata ai ona fafau ma totō le fatu i totonu o lenei taaloga e pei ona toatele augatupulaga o lea ‘auaiga na fai mai e avea ma tagata iloga i le faagatama o le pii.

Ae o se fatu na amata totōina mai e le tamalii, le afioga i le Fanene Leifi Pita Maivia o se uō mamae, ae o sē ua pei o se uso moni, i le tuaa o Sika ma Afa Anoa’i.  

O le tamā ia Polaivao Leati Sika Anoa’i ua maliu i le 79 o ona tausaga.

E toalima ona alo e aofia ai ma le alii ta’uta’ua ia Leati Joseph Anoa’i poo Roman Reigns ua tele foi ana manumalo i suega siamupini o le taaloga o piiga.