Ua faailoa e le sui faipule o Faleata 3 i le Palemene le tofa Lealailepule Rimoni Aiafi, o le faamasinoga e oo iai le faai’uga a le Palemene ua pasia ai i le lua vae tolu teuteuga o le faavae 2025 faasino i le Faamasinoga o Fanua ma Suafa.
O le finagalo o lea sui faipule sinia o le Itu Agai e mafua mai i le tau faamaninoina o aiaiga o le faavae i le numela e tatau ona maua ai le lua vae tolu o nofoa e 53 o le Palemene lea sa faaalia e le Fofoga Fetalai e 35 tesimale 33 ae sa saunoa Lealailepule ua iai se faai’uga a le faamasinoga i le faauigaina o vaegāmea tau fuainumela e pei o le faai’uga i le faamasinoga o le 10 pasene o nofoa o tamaitai.
Le sui faipule o Gagaifomauga 3 le susuga Laauli Leuatea Polataivao Fosi Schmidt ma le faipule o Faleata 3 le tofa Lealailepule Rimoni Aiafi i o la finagalo a o sauni le Palemene i le palota e sa’ili ai le lua vaetolu e pasia ai teuteuga o le faavae o le tausaga 2025.
O le palota tau valaau na palota lagolago ai le Fofoga Fetalai ina ua ia talia le fautuaga faaletulafono mai le Loia Sili a le Malo.
E to’a sefuluono sui faipule o le Itu Agai na palota tetee i teuteuga o le faavae 2025.
Na latou teena foi le fesili mai le Fofoga Fetalai mo le pasiaina o teuteuga o le tulafono o Faamasinoga o Fanua ma Suafa 2025.
